ચારધામ યાત્રાનું રજીસ્ટ્રેશન કરાવવા ગયેલા હજારો શ્રદ્ધાળુઓ રઝળી પડ્યાં

દર વર્ષે અનેક લોકો ચારધામ યાત્રામાં જતી વખતે મોતને ભેટે છે. ધક્કામુક્કી, ચોરી, રોડ અકક્માત, પહાડો ધસી પડવા, વરસાદ જેવા અનેક સંકટો છતાં ભારતીય પ્રજાના માનસમાંથી આ ચાર ધામ યાત્રા કરવાનો ક્રેઝ જરાય ઘટતો નથી. ચારધામ ઓફલાઈન રજીસ્ટ્રેશન ભક્તો માટે ૧૬ દિવસ માટે ખુલ્લું મુકવામાં આવ્યું હતું. યાત્રામાં રજીસ્ટ્રેશન કરાવવા માટે શ્રદ્ધાળુઓની ભારે ભીડ જોવા મળી હતી. પરંતુ ચાર કલાક સુધી લાઈનમાં ઉભા રહ્યા બાદ પણ ભક્તો ખાલી હાથે જ રહ્યા હતા. ચાર કલાક સુધી લાઈનમાં ઉભા રહ્યા બાદ પણ હજારો લોકો નોંધણી કરાવી શક્યા નથી. કેદારનાથ, બદ્રીનાથ, યમુનોત્રી સહિતના ચાર ધામોના તમામ રજીસ્ટ્રેશન સ્લોટ ભરાઈ ગયા હતા. 

ઉલ્લેખનીય છે કે ઓફલાઈન રજીસ્ટ્રેશન ૧૫ મેથી બંધ કરવામાં આવ્યું હતું, જે ૧ જૂનથી ફરી શરૂ કરવામાં આવ્યું હતું. રવિવારે હરિદ્વારના ઋષિકુલ ગ્રાઉન્ડ ખાતે ઓફલાઈન રજીસ્ટ્રેશનના બીજા દિવસે પ્રથમ સાડા ચાર કલાકમાં ૧૫૦૦ રજીસ્ટ્રેશન પૂર્ણ થયા હતા. એ પછી જિલ્લા પ્રવાસન વિભાગે કાઉન્ટર બંધ કરી દીધું. કાઉન્ટર બંધ થયા બાદ ઋષિકુળ મેદાનમાં પહોંચેલા હજારો શ્રદ્ધાળુઓ કલાકો સુધી કતારમાં ઉભા રહીને નિરાશ અને અસ્વસ્થ થઈને પરત ફર્યા હતા. સાથે જ ચારધામમાં ભક્તોની સુવિધા માટે હરિદ્વાર ટ્રાવેલ્સ એસોસિએશને રજીસ્ટ્રેશનની સંખ્યા વધારીને ૫૦૦૦ પ્રતિદિન કરવાની માંગ કરી છે. રવિવારે ઋષિકુળ મેદાનમાં અરાજકતા જોવા મળી હતી. ચારધામ યાત્રા માટે રજીસ્ટ્રેશન કરાવવા આવેલા હજારો શ્રદ્ધાળુઓ કાળઝાળ ગરમીમાં કતારમાં ઉભા રહીને રજીસ્ટ્રેશન માટે કલાકો સુધી રાહ જોતા જોવા મળ્યા હતા. મેદાનમાં શ્રદ્ધાળુઓને તડકાથી બચાવવા માટે કોઈ વ્યવસ્થા નથી. રજીસ્ટ્રેશન માટે સવારના છ વાગ્યાથી ભક્તો લાઈનમાં ઉભા રહેવા લાગ્યા હતા. સાત વાગ્યાથી ભક્તોની નોંધણી શરૂ થઈ ગઈ હતી. ૧૫૦૦ નોંધણી પૂર્ણ થયા બાદ કાઉન્ટર લગભગ ૧૧. ૩૦ વાગ્યે બંધ કરવામાં આવ્યું હતું. જેના કારણે કલાકો સુધી કતારમાં ઉભા રહીને પણ રજીસ્ટ્રેશન ન થતાં હજારો શ્રદ્ધાળુઓ નિરાશ દેખાયા હતા. મોટી સંખ્યામાં ભક્તો ભરતડકે મેદાનમાં ઉભેલા જોવા મળ્યા હતા. લાઈનમાં ઉભા રહીને પણ રજીસ્ટ્રેશન ન થતા ભક્તો હેરાન થઈ ગયા હતા. 

આ પણ વાંચો: ચારધામ યાત્રા અને મોતનો ખતરો અને લૂંટની ખાતરી

રજીસ્ટ્રેશન પૂર્ણ થયા બાદ હજારો શ્રદ્ધાળુઓ કે જેઓ દૂર દૂરથી આવ્યા હતા તેમની વાત સાંભળવામાં નહોતી આવી. તેમજ રજીસ્ટ્રેશન ન થવાના કારણે ભક્તોએ બીજા દિવસે રજીસ્ટ્રેશન માટે રાહ જોવી પડી હતી. જેના કારણે શ્રદ્ધાળુઓનો પ્રવાસ સમય અને ખર્ચ બજેટની બહાર જઈ રહ્યો છે. ભક્તોને ભારે મુશ્કેલીઓનો સામનો કરવો પડી રહ્યો છે. હરિદ્વાર ટ્રાવેલ એસોસિએશનના પ્રમુખ ઉમેશ પાલીવાલ અને જનરલ સેક્રેટરી સુમિત શ્રીકુંજે પ્રશાસન પાસે ભક્તોની સુવિધા માટે રજીસ્ટ્રેશનની સંખ્યા વધારીને પાંચ હજાર પ્રતિદિન કરવાની માંગ કરી છે. તેમજ એક દિવસનું રજીસ્ટ્રેશન પૂર્ણ થયા બાદ કતારમાં ઉભેલા તમામ ભક્તોને બીજા દિવસે રજીસ્ટ્રેશન કરાવવાની માંગણી કરવામાં આવી છે. જેથી કતારમાં ઉભેલા ભક્તોને પણ રજીસ્ટ્રેશન મળી શકે અને ભક્તને રજીસ્ટ્રેશન માટે બીજા દિવસે ફરીથી કતારમાં ઉભા રહેવાની ચિંતા ન કરવી પડે.

૧૦ મેથી શરૂ થયેલી ચારધામ યાત્રા માટે ઓનલાઈન અથવા ઓફલાઈન રજીસ્ટ્રેશન ફરજિયાત છે. બદ્રીનાથ અને કેદારનાથ સહિત ચાર ધામોમાં જવા માટે માત્ર રજીસ્ટ્રેશન ધરાવતા યાત્રીઓને જ મંજૂરી આપવામાં આવી રહી છે. ૧૫મી મેથી બંધ થયેલ ઓફલાઈન રજીસ્ટ્રેશન ૧લી જૂને ફરી શરૂ કરવામાં આવ્યું હતું. સવારે સાડા અગિયાર વાગ્યે રજિસ્ટ્રેશન પૂર્ણ થયા બાદ કાઉન્ટર બંધ કરી દેવામાં આવ્યું હતું. ગઢવાલ કમિશનરની સૂચના મુજબ, દરરોજ ૧૫૦૦ રજિસ્ટ્રેશન થઈ રહ્યાં છે. ઉચ્ચ કક્ષાએથી સૂચના મળ્યા બાદ જ લાઈનમાં ઉભેલા ભક્તોને બીજા દિવસ માટે રજીસ્ટ્રેશન કરાવી શકાશે. 

નોંધણી માટે દરરોજ સાત હજાર ભક્તો આવી રહ્યા છે. રજીસ્ટ્રેશનની સંખ્યા માત્ર ૧૫૦૦ નક્કી કરવામાં આવી છે. ઋષિકેશમાં રવિવારે બીજા દિવસે ઑફલાઇન રજિસ્ટ્રેશન માટે મુસાફરોની ભીડ ઉમટી હતી. સવારના ૭ વાગ્યાથી જ રજીસ્ટ્રેશન કાઉન્ટર પર મુસાફરોની લાંબી કતારો જોવા મળી હતી. માત્ર પાંચ કલાકમાં રાજ્ય સરકાર દ્વારા નક્કી કરાયેલા ૧૫૦૦ મુસાફરોની નોંધણી માટેનો સ્લોટ ભરાઈ ગયો હતો. રજિસ્ટ્રેશનથી વંચિત રહી ગયેલા મુસાફરોને બીજા દિવસ માટે ટોકન આપવામાં આવ્યા હતા. બિહાર, મધ્યપ્રદેશ, યુપી, રાજસ્થાન, મહારાષ્ટ્ર અને પશ્ચિમ બંગાળના વધુ મુસાફરો રજીસ્ટ્રેશન માટે કતારમાં જોવા મળ્યા હતા. ચારધામ યાત્રાને લઈને લોકોમાં ગાંડપણની હદે ઉત્સાહ જોવા મળ્યો હતો.

નોંધણી પછી યાત્રિકો બદ્રી-કેદારના મંત્રોચ્ચાર સાથે ચાર ધામની યાત્રા માટે રવાના થયા હતા. ગઢવાલના એડિશનલ કમિશનર નરેન્દ્ર સિંહ ક્વિરિયાલે જણાવ્યું હતું કે સરકાર દરેક તીર્થયાત્રીને સલામત અને સરળ મુસાફરી પૂરી પાડવા માટે પ્રતિબદ્ધ છે, જેને ધ્યાનમાં રાખીને ચાર ધામોની સ્થિતિ સામાન્ય થયા બાદ ઑફલાઇન કાઉન્ટર ખોલવામાં આવ્યું છે.

આ પણ વાંચો: ચારધામ યાત્રામાં આ વર્ષે 52, કેદારનાથમાં 10 વરસમાં 350 લોકોના મોત