દલિત મહિલાની ગોળી મારી હત્યા, બંદૂક-તલવારો સાથે 30 લોકોનો હુમલો

જાતીય હિંસા માટે કુખ્યાત થઈ ચૂકેલા મધ્યપ્રદેશમાં દલિત પરિવાર પર હિંસાની વધુ એક ઘટના સામે આવી છે. અહીં 5 ગાડીઓ ભરીને આવેલા 30 જેટલા માથાભારે તત્વોએ બંદૂક, તલવારો અને લાકડીઓ વડે દલિત પરિવાર પર હુમલો કરી દીધો હતો. આ હુમલામાં 42 વર્ષીય મહિલા ગીતા બાઈનું ગોળી વાગવાથી મોત થયું હતું, જ્યારે પરિવારના અન્ય ચાર સભ્યો ગંભીર રીતે ઘાયલ થયા હતા. હુમલાનું કારણ જમીન વિવાદ હોવાનું કહેવાય છે. ઘટના બાદ રોષે ભરાયેલા ગ્રામજનોએ મૃતદેહને રસ્તા વચ્ચે રાખીને ચક્કાજામ કરી આરોપીઓની ધરપકડની માંગ કરી છે.

ઘટના મધ્યપ્રદેશના મંદસૌર જિલ્લાની છે. અહીં જાતીય હિંસાનો ભયાનક ચહેરો સામે આવ્યો છે. અહીં પાંચ વાહનોમાં સવાર થઈને આવેલા 30 જેટલા લોકોએ દલિત પરિવાર પર જીવલેણ હુમલો કર્યો હતો. હુમલાખોરો બંદૂકો, તલવારો અને લાકડીઓથી સજ્જ હતા. તેમણે દલિત પરિવારના ઘરમાં ઘૂસીને અંધાધૂંધ ગોળીબાર કર્યો, જેમાં ગીતાબાઈ નામની 42 વર્ષીય મહિલાનું ગોળી વાગવાથી ઘટનાસ્થળે જ મોત થયું હતું. જ્યારે પરિવારના અન્ય ચાર સભ્યો ગંભીર રીતે ઘાયલ થયા હતા. આ ઘટનાને પગલે સમગ્ર વિસ્તારમાં ભય અને રોષની લાગણી ફેલાઇ છે.

મોડી રાત્રે હુમલો થયો, જીવ બચાવવાની પણ તક ન મળી

રવિવારે રાત્રે આ દલિત પરિવારના ઘર પર હુમલો થયો હતો. હુમલાખોરોએ પહેલા ઘરને ચારે બાજુથી ઘેરી લીધું અને પછી અચાનક હુમલો શરૂ કરી દીધો. પરિવારે પોતાનો જીવ બચાવવાનો પ્રયાસ કર્યો હતો પરંતુ હથિયારો સાથે આવેલા હુમલાખોરોએ તેમને કોઈ તક આપી ન હતી. હુમલા દરમિયાન ઘરની અંદર રહેલી ગીતાબાઈને નિશાન બનાવીને ગોળી મારવામાં આવી હતી.

જમીન અને મિલકતના વિવાદનું પરિણામ

પરિવારના સભ્યોનો આરોપ છે કે આ હુમલો ગામના માથાભારે સમાજ દ્વારા કરવામાં આવ્યો હતો, જેઓ લાંબા સમયથી તેમની જમીન અને મિલકત પર કબજો કરવા માંગતા હતા. પરિવારે આ અંગે પોલીસને અનેક વખત ફરિયાદ કરી હતી પરંતુ તેમની ફરિયાદને અવગણવામાં આવી હતી. આ હુમલો એ દુશ્મનાવટનું પરિણામ છે.

ઘાયલોની હાલત ગંભીર છે

હુમલામાં ઘાયલ અન્ય ચાર લોકોમાં એક 12 વર્ષની બાળકી પણ સામેલ છે. તમામ ઘાયલોને જિલ્લા હોસ્પિટલમાં દાખલ કરવામાં આવ્યા છે, જ્યાં તેમની હાલત નાજુક છે. ડૉક્ટરોએ જણાવ્યું કે ઘાયલોમાં બે લોકોને ગોળી વાગી હતી, જ્યારે અન્ય લોકોને તલવાર અને લાકડીઓથી ઈજા થઈ હતી.

મૃતદેહને રસ્તે રાખીને વિરોધ પ્રદર્શન કરાયું

ઘટના બાદ રોષે ભરાયેલા ગ્રામજનો અને પરિવારજનોએ મૃતક ગીતાબાઈના મૃતદેહને રસ્તા પર મૂકી દીધો હતો અને ચક્કાજામ કર્યો હતો. તેમણે આરોપીઓની તાત્કાલિક ધરપકડ કરી દોષિતોને કડકમાં કડક સજા કરવાની માંગ કરી છે. વિરોધ પ્રદર્શનને કારણે મુખ્ય માર્ગ પરનો વાહનવ્યવહાર સંપૂર્ણપણે ઠપ થઈ ગયો હતો. પ્રદર્શનકારીઓએ વહીવટીતંત્ર પર બેદરકારીનો આરોપ મૂક્યો અને કહ્યું કે જો તેમની ફરિયાદ પર સમયસર પગલાં લેવામાં આવ્યા હોત તો આ ઘટના ટાળી શકાઈ હોત.

મામલાની ગંભીરતા જોઈને વરિષ્ઠ પોલીસ અને પ્રશાસનના અધિકારીઓ ઘટનાસ્થળે પહોંચી ગયા હતા. એસપીએ ઘટનાની તપાસ કરવા અને આરોપીઓને વહેલી તકે ધરપકડ કરવા માટે વિશેષ ટીમ બનાવવાની ખાતરી આપી હતી. જો કે, વહીવટીતંત્ર તેમની તમામ માંગણીઓ લેખિતમાં સ્વીકારે નહીં ત્યાં સુધી ગ્રામજનો શાંત થયા ન હતા.

દલિતો સામે વધી રહેલી હિંસા, વહીવટીતંત્રની નિષ્ફળતા છતી થઈ

આ ઘટનાએ ફરી એકવાર દલિત સમાજ સામેની હિંસા અને વહીવટીતંત્રની નિષ્ક્રિયતા છતી કરી છે. પીડિત પરિવાર ન્યાય માટે લડત ચલાવી રહ્યો છે, પરંતુ આ ઘટના સમાજમાં પ્રવર્તતા જાતિ ભેદભાવ અને હિંસાના મૂળ કેટલા ઊંડા છે તે દર્શાવે છે. ગ્રામજનો અને પરિવારજનોએ ચીમકી આપી છે કે આરોપીઓ સામે વહેલીતકે કાર્યવાહી કરવામાં નહીં આવે તો આંદોલન વધુ ઉગ્ર બનાવાશે. આ ઘટના માત્ર મંદસૌર જિલ્લા માટે જ નહીં પરંતુ સમગ્ર સમાજ માટે ગંભીર ચેતવણી છે કે જો જાતિ ભેદભાવ અને જાતીય હિંસા રોકવામાં નહીં આવે તો આવી ઘટનાઓ વારંવાર બનતી રહેશે.

આ પણ વાંચો: 'મારા ખેતરમાં ઢોર કેમ ચરાવો છો?' પૂછતા દલિત મહિલાની હત્યા