કાલુપુર સ્વામિનારાયણ મંદિરે હરિભક્તોને ભાજપને મત આપવા અપીલ કરી

Lok Sabha Election 2024: આવતીકાલે 7 મેના રોજ લોકસભા ચૂંટણીનું ત્રીજા તબક્કાનું મતદાન થવાનું છે. જેમાં ગુજરાતની 25 સીટો પણ સામેલ છે. રાજકીય પક્ષો દ્વારા ચૂંટણી પ્રચારની સમયમર્યાદા ગઈકાલે સાંજે પૂર્ણ થઈ ગઈ હતી. એ પછી હવે નેતાઓ ડોર ટુ ડોર પ્રચારમાં લાગી ગયા છે. ગુજરાતમાં હાલ એકબાજુ ક્ષત્રિયો ભાજપ સામે મોરચો માંડીને બેઠા છે, બીજી તરફ કાલપુર સ્વામિનારાયણ મંદિરે દ્વારા એક પત્ર લખીને હરિભક્તોને અપીલ કરવામાં આવી છે. આ પત્ર દ્વારા ક્યા પક્ષને મત આપવો તે કહેવામાં આવ્યું છે.

ભાજપને મત આપવા મંદિરની અપીલ

કાલુપુર સ્વામિનારાયણ મંદિર દ્વારા હરિભક્તોને પત્ર લખીને અપીલ કરવામાં આવી છે કે 7 મેનાં રોજ હરિભક્તો કમળનું બટન દબાવી ભાજપને મત આપે. તેજેન્દ્રપ્રસાદ મહારાજ, કૌશલેન્દ્રપ્રસાદ અને વ્રજેન્દ્રપ્રસાદ દ્વારા હરિભક્તોને આ અપીલ કરવામાં આવી છે. આ પત્રમાં રામ મંદિર બનાવવાના નિર્માણમાં સહભાગી થવા ભાજપને મત આપવા ઉલ્લેખ કરવામાં આવ્યો છે. સાથે જ રાજકીય મતભેદ ભૂલી જઈને આડકતરી રીતે ક્ષત્રિયોને પણ વિનંતીના સૂરમાં કમળનું બટન દબાવવા પત્રમાં ઉલ્લેખ કરાયાનું દેખાય છે.

ગરમી વચ્ચે લોકો મતદાનની ટકાવારી ઘટે તેવી શક્યતા

ઉલ્લેખનીય છે કે, લોકસભા ચૂંટણી 2024ના ત્રીજા તબક્કાનું મતદાન આવતીકાલે 7 મેના રોજ થશે. આ તબક્કામાં 12 રાજ્યોની 94 બેઠકો પર ઉમેદવારોનું ભાવિ EVMમાં કેદ થશે. કાળઝાળ ગરમી વચ્ચે મતદારોને ઘરની બહાર કાઢવું ​​એ ચૂંટણી પંચ માટે એક પડકાર છે. ભાજપને પણ ઓછું મતદાન થાય તે પોસાય તેમ નથી. તેથી મંદિરો, સાધુ સંતોને તેમના અનુયાયીઓ, ભક્તોનો મત આપવા માટે પ્રોત્સાહિત કરવા અપીલ કરાઈ હતી.

આ પણ વાંચો : ઉજ્જૈનના મહાકાલ મંદિરમાં હોળી રમતી વખતે ગર્ભગૃહમાં આગ લાગી, 13 પૂજારીઓ દાઝ્યાં

વોટિંગની વાત કરીએ ગુજરાત સહિત 12 રાજ્યોની 94 બેઠકો પર આવતીકાલે સવારે 7 વાગ્યાની આસપાસ મતદાન શરૂ થશે અને સાંજે 5 વાગ્યે સમાપ્ત થશે. આ તબક્કામાં બિહાર, છત્તીસગઢ, કર્ણાટક, કેરળ, મધ્યપ્રદેશ, મહારાષ્ટ્ર, ઉત્તર પ્રદેશ અને પશ્ચિમ બંગાળ જેવા કેટલાક મોટા રાજ્યોમાં મતદાન થશે.

અગાઉ, જમ્મુ-કાશ્મીરની અનંતનાગ-રાજૌરી લોકસભા સીટ માટે પણ તે જ દિવસે મતદાન થવાનું હતું, પરંતુ અહીં મતદાનને 25 મે પર નિર્ધારિત કરવામાં આવ્યું છે. તમામ સીટો પર 4 જૂને મતગણતરી થવાની છે.

ગુજરાતની 25 બેઠકો પર મતદાન થશે

ગુજરાતમાં સુરતની બેઠક બિનહરીફ થતા હવે 25 બેઠકો પર મતદાન થવાનું છે. જેમાં અમદાવાદ પશ્ચિમ અને કચ્છની બેઠકો એસસી અનામત છે જ્યારે ચાર બેઠકો અનુસૂચિત જનજાતિ સમાજ માટે અનામત છે.

(25 લોકસભા બેઠકો): કચ્છ, બનાસકાંઠા, પાટણ, મહેસાણા, સાબરકાંઠા, ગાંધીનગર, અમદાવાદ પૂર્વ, અમદાવાદ પશ્ચિમ, સુરેન્દ્રનગર, રાજકોટ, પોરબંદર, જામનગર, જૂનાગઢ, અમરેલી, ભાવનગર, આણંદ, ખેડા, પંચમહાલ, દાહોદ, વડોદરા, છોટા ઉદયપુર, ભરૂચ, બારડોલી, નવસારી, વલસાડ

આ પણ વાંચો :રાજકીય પાવરહાઉસ ગણાતી અમદાવાદ પશ્ચિમ SC અનામત બેઠક પર ‘મકવાણા Vs. મકવાણા’નો જંગ