વોટ્સએપ ચેનલ ફોલો કરવા અહીં ક્લિક કરો.
National Dastak ચેનલના બેંક એકાઉન્ટ ફ્રીઝ, બહુજન મીડિયાને દબાવવાનો પ્રયાસ?
નેશનલ દસ્તકના એડિટર શંભુકુમાર સિંહે જણાવ્યું છે કે, ઈન્કમ ટેક્સ વિભાગે કોઈપણ સુનાવણી વિના તેમની મીડિયા કંપનીના બેંક ખાતા સીલ કરી દીધાં છે.
KhabarAntar
બહુજન સમાજની સમસ્યાઓ અને મુદ્દાઓને વાચા આપતા દેશના અગ્રણી ડિજિટલ મીડિયા પ્લેટફોર્મ 'નેશનલ દસ્તક'ના બેંક ખાતાને આવકવેરા વિભાગે ફ્રીઝ કરી દીધું છે. આ ઘટનાએ મીડિયાની સ્વતંત્રતા અને અભિવ્યક્તિની સ્વતંત્રતા પર ગંભીર પ્રશ્નો ઉભા કર્યા છે. નેશનલ દસ્તકના સ્થાપક અને સંપાદક શંભુ કુમાર સિંહે તેને બહુજન સમાજના અવાજને દબાવવા માટે સરકારનું કાવતરું ગણાવ્યું છે.
શંભુ કુમારે જણાવ્યું હતું કે આવકવેરા વિભાગે સુનાવણી માટે કોઈ સમય આપ્યા વિના તેમની મીડિયા કંપનીના બેંક ખાતાઓ સ્થગિત કરી દીધા હતા. સામાન્ય પ્રક્રિયા મુજબ નોટિસ પછી ઓછામાં ઓછો એક મહિનાનો સમય આપવામાં આવે છે, પરંતુ અહીં સીધી કાર્યવાહી કરવામાં આવી હતી. શંભુ કુમારે તેને "બહુજન સમાજના અવાજને દબાવવા અને સરકાર પર સવાલ ઉઠાવનારાઓ સામે બિનજરૂરી કાર્યવાહી કરવાનો" એક ભાગ ગણાવ્યો.
કર્મચારીઓનો પગાર વિલંબમાં મૂકાયો
નેશનલ દસ્તકની ટીમમાં કુલ 10 લોકો કામ કરે છે, જેમને દર મહિને નિયમિતપણે પગાર ચૂકવવામાં આવે છે. આ મહિને પણ પગાર ચૂકવવાનો સમય હતો, પરંતુ આવકવેરા વિભાગે કોઈપણ સૂચના કે નોટિસ આપ્યા વિના તેમનું બેંક ખાતું ફ્રીઝ કરી દીધું, જેના કારણે કર્મચારીઓનો પગાર અટકી ગયો છે.
નેશનલ દસ્તકના રિપોર્ટર નિધિ રતને આરોપ લગાવ્યો કે આ કાર્યવાહી ફક્ત એટલા માટે કરવામાં આવી છે કારણ કે નેશનલ દસ્તક વંચિત અને શોષિત સમાજનો અવાજ ઉઠાવે છે. નિધિએ કહ્યું, "સરકાર અમને ચૂપ કરવા માટે આવી યુક્તિઓ અપનાવી રહી છે જેથી અમને સમાજના પ્રશ્નો અને સમસ્યાઓ ઉઠાવતા અટકાવતા રોકી શકાય."
અગાઉ માહિતી અને પ્રસારણ મંત્રાલયે નોટિસ મોકલી હતી
નેશનલ દસ્તક ચેનલ પર આ કાર્યવાહી પહેલી વાર નથી રહી. અગાઉ, લોકસભા ચૂંટણી દરમિયાન દિલ્હીના માહિતી અને પ્રસારણ વિભાગે નેશનલ દસ્તકને નોટિસ મોકલી હતી અને તેની યુટ્યુબ ચેનલ બંધ કરવાનું કહ્યું હતું.
શંભુ કુમાર માને છે કે નેશનલ દસ્તક વંચિત અને શોષિત સમાજનો અવાજ ઉઠાવવાનું કામ કરે છે, જે સરકારને અસહજ કરી મૂકે છે. તેમણે કહ્યું, "સરકારને પ્રશ્નો પૂછનારા અને બહુજન સમાજના મુદ્દાઓ ઉઠાવનારાઓને ચૂપ કરવા માટે આ યુક્તિઓ અપનાવવામાં આવી રહી છે."
બંધારણની કલમ 19(1)(a) દરેક નાગરિકને અભિવ્યક્તિની સ્વતંત્રતાનો અધિકાર આપે છે. આવી સ્થિતિમાં યોગ્ય પ્રક્રિયા વિના મીડિયા સંસ્થાઓ સામે કાર્યવાહી કરવી એ લોકશાહી મૂલ્યોની વિરુદ્ધ છે. શંભુ કુમારે કહ્યું કે નેશનલ દસ્તક આ અન્યાયી કાર્યવાહી સામે કાનૂની લડાઈ લડશે.
આ પણ વાંચો: શંભુ કુમાર સિંહની નેશનલ દસ્તક યુટ્યૂબ ચેનલને બંધ કરવાની નોટિસ મળી
