વોટ્સએપ ચેનલ ફોલો કરવા અહીં ક્લિક કરો.
સત્યનારાયણની કથા બંધ કરાવાતા બ્રાહ્મણોએ જયંત પંડ્યાના ઘરે હલ્લો મચાવ્યો
રાજકોટના કર્મકાંડી બ્રાહ્મણોએ વિજ્ઞાન જાથાના જયંત પંડ્યાના ઘરે ગંગાજળનો છંટકાવ કરી જયંત પંડ્યા હાય હાયના નારા લગાવ્યા.
KhabarAntar
રાજકોટની પારડી પી.જી.વી.સી.એલ. ખાતે કચેરીમાં ચાલતી સત્યનારાયણ ભગવાનની કથા ભારતીય જનવિજ્ઞાન જાથાએ બંધ કરાવી હતી. આથી આ સંસ્થાના જયંત પંડ્યાના ઘરે ભૂદેવ સેવા સમિતિ મોરચો લઈને વિરોધ નોંધાવ્યો હતો. રાજકોટમાં કર્મકાંડી બ્રાહ્મણો દ્વારા જયંત પંડ્યાના ઘરે ગંગાજળનો છંટકાવ કરવામાં આવ્યો હતો અને જયંત પંડ્યા હાય હાયના નારા લગાવ્યા હતા. આ સાથે જાથા નામની સંસ્થા તોડબાજી કરતી હોવાના આક્ષેપો કરાયા હતા. આ બાબતે વડાપ્રધાન સુધી લેખિત રજૂઆત કરવા માટે એલાન કરાયું હતું. દરમિયાન અધૂરી રહેલી સત્યનારાયણ ભગવાનની કથા આવતીકાલે સાંજે જયંત પંડ્યાના ઘર બહાર જ કરવામાં આવશે તેવી જાહેરાત કરાઈ હતી.
ગત શુક્રવારે રાજકોટના શાપર વેરાવળના પારડી ખાતે આવેલી પી.જી.વી.સી.એલ.ની કચેરી ખાતે ભારતીય જન વિજ્ઞાન જાથાના જયંત પંડ્યા પહોંચ્યા હતા અને ચાલુ કચેરીએ યોજવામાં આવી રહેલી સત્યનારાયણ ભગવાનની કથાને બંધ કરાવી હતી. જે બાદ બ્રાહ્મણો રોષે ભરાયા હતા.
આજે રાજકોટમાં ભૂદેવ સેવા સમિતિ દ્વારા તેને લઈને વિરોધ કરવામાં આવ્યો હતો. આ સમિતિના તેજસ ત્રિવેદીએ મીડિયાને જણાવ્યું હતું કે, તેઓ દાનવના ઘરને શુદ્ધિકરણ કરવા માટે આવ્યા હતા. જેમાં કર્મકાંડી બ્રાહ્મણો દ્વારા શ્લોકના ઉચ્ચારણ સાથે ગંગાજળનો છંટકાવ કરવામાં આવ્યો હતો. કારણ કે દાનવનું ઘર શુદ્ધ ન હોઈ શકે.
તેમણે જણાવ્યું હતું કે, જયંત પંડ્યા ભારતીય જન વિજ્ઞાન જાથાના નામે તોડબાજી થાય છે તે બાબતે રાજ્ય સરકારને અમારું પ્રતિનિધિ મંડળ રજૂઆત કરવા માટે જશે. જયંત પંડ્યા તોડબાજી કરીને પોતાનું ગુજરાન ચલાવે છે. જેથી રાજ્ય સરકારને પણ અમે વિનંતી કરીએ છીએ કે, આ ટ્રસ્ટ બંધ કરાવવામાં આવે. હિન્દુ દેવી દેવતાઓના મંદિરો ઉપર જાથા વારંવાર રેડ પાડે છે. કારણ કે હિન્દુઓની સરકાર છે અથવા તો સરકારે એવી જાહેરાત કરવી પડશે કે જાથાને હિન્દુ દેવી-દેવતાઓને ત્યાં રેડ પાડવા માટેની અમે પરમિશન આપેલી છે. અમે વડાપ્રધાન નરેન્દ્ર મોદીને પણ રજૂઆત કરશું અને પૂછશું કે શું સરકારે હિન્દુ દેવી દેવતાઓના મંદિરે રેડ પાડવાની જયંત પંડ્યાને પરમિશન આપેલી છે?
આ પણ વાંચો: સોમનાથમાં બહારના બ્રાહ્મણો પાસે પૂજા કરાવાતા સ્થાનિક બ્રાહ્મણો ઉપવાસ પર ઉતર્યા
