મેળામાં આવેલી આદિવાસી યુવતી પર 8 શખ્સોએ સામૂહિક બળાત્કાર કર્યો

એકબાજુ દલિત-આદિવાસીઓની અનામતમાં ભાગલા પાડી તેમને અંદરોઅંદર લડાવી મારવાનું કાવતરું રચાઈ રહ્યું છે, દેશભરનો એસસી-એસટી સમાજ તેમના હક માટે મેદાને પડ્યો છે, બીજી તરફ તેમના પર અત્યાચારો ઓછા થવાનું નામ નથી લઈ રહ્યાં છે. આવી જ એક ઘટના બે દિવસ પહેલા બની ગઈ. જેમાં એક આદિવાસી યુવતી પર 8 શખ્સોએ સામૂહિક બળાત્કાર કર્યો હતો.

ઘટના આદિવાસી બહુમતિ ધરાવતા છત્તીસગઢની છે. અહીં રાયપુર જિલ્લામાં ૨૭ વર્ષીય આદિવાસી મહિલા પર ૮ શખ્સો દ્વારા કથિત રીતે બળાત્કાર કરવામાં આવ્યો હોવાનું પોલીસે જણાવ્યું હતું. ઘટના સોમવારે પુસૌર પોલીસ સ્ટેશન વિસ્તાર હેઠળના એક ગામમાં બની હતી જ્યારે પીડિતા રક્ષાબંધનનો તહેવાર મનાવીને સ્થાનિક મેળામાં જઈ રહી હતી.

પોલીસ અધિકારીના જણાવ્યા મુજબ, મહિલાએ મંગળવારે આ સંબંધમાં ફરિયાદ નોંધાવતા પોલીસે એફઆઈઆર નોંધીને કાર્યવાહી શરૂ કરી હતી. ફરિયાદ મુજબ, કેટલાક લોકોએ મહિલાને રોકી હતી અને બળજબરીથી નજીકના તળાવના કિનારે લઈ ગયા. જ્યાં બધાએ એક પછી એક તેના પર બળાત્કાર કર્યો હતા. પીડિતાની ફરિયાદના આધારે અત્યાર સુધીમાં છ આરોપીઓની ધરપકડ કરવામાં આવી છે. આ મામલે વધુ તપાસ ચાલુ છે.

આ પણ વાંચો: દલિત કિશોરી પર દુષ્કર્મ આચરી છરીના ઘા મારી હત્યા કરી દેવાઈ

બિલાસપુરના રેન્જ આઈજી સંજીવ શુક્લાએ જણાવ્યું હતું કે, આ ઘટના સોમવારે સાંજે બની હતી. મહિલા રક્ષાબંધનનો તહેવાર હોવાથી સ્થાનિક મેળામાં ગઈ હતી. એ દરમિયાન મુખ્ય આરોપી તેને મેળામાં મળી ગયો હતો, તેની સાથે બીજા આરોપીઓ પણ હતા. યુવતી મુખ્ય આરોપીને ઓળખતી હોવાથી તેના ભસોરે મેળામાં મહાલી રહી હતી. એ પછી આ લોકો તેને તળાવના કાંઠે બળજબરી કરીને લઈ ગયા હતા. જ્યાં મુખ્ય આરોપી સાથે રહેલા આઠ શખ્સોએ તેની સાથે બળાત્કાર કર્યો હતો. ઘટના બાદ આરોપીએ મહિલાને જાનથી મારી નાખવાની ધમકી આપી હતી અને ત્યાંથી ભાગી ગયા હતા.

રેન્જ આઈજીએ કહ્યું કે મંગળવાર રાત સુધીમાં છ લોકોની ધરપકડ કરી લેવામાં આવી છે. જ્યારે બે આરોપીઓ ફરાર છે. રાયગઢના પોલીસ અધિક્ષક દિવ્યાંગ પટેલે જણાવ્યું હતું કે તેઓ આ મામલામાં સંડોવાયેલા અન્ય લોકો વિશે જાણવા માટે ધરપકડ કરાયેલા આરોપીઓની પૂછપરછ કરી રહ્યાં છે અને તેમની પણ ટૂંક સમયમાં ધરપકડ કરવામાં આવશે.

એસપીએ કહ્યું કે પુસૌર પોલીસે આ મામલે સામૂહિક બળાત્કારનો કેસ નોંધ્યો છે અને તપાસ ચાલી રહી છે. અમે આરોપીની ઓળખ જાહેર કરી રહ્યા નથી કારણ કે તેનાથી તપાસમાં અવરોધ આવી શકે છે. મામલો ગંભીર છે. દરમિયાન, રાજ્યના પૂર્વ મુખ્યમંત્રી ભૂપેશ બઘેલે આ ઘટનાને ગંભીર ગણાવી હતી અને તમામ આરોપીઓની તાત્કાલિક ધરપકડ અને સજાની માંગ કરી હતી.

આ પણ વાંચો: નાઈટ ડ્યૂટી પર તૈનાત દલિત નર્સ સાથે ડોક્ટરે દુષ્કર્મ આચર્યું