વોટ્સએપ ચેનલ ફોલો કરવા અહીં ક્લિક કરો.
ગણેશજીને સુરક્ષાની જરૂર પડી, 20 પંડાલોમાં પોલીસે કેમેરા મૂક્યા
વિધ્નહર્તા મનાતા ગણેશજીના પંડાલોની સુરક્ષા અમદાવાદ પોલીસ માથે આવી પડી છે. પોલીસે સંવેદનશીલ ગણાતા 20 પંડાલોની બહાર મુવેબલ કેમેરા મૂક્યા છે.
KhabarAntar
ગણેશજીને હિંદુ ધર્મમાં વિધ્નહર્તા તરીકે પૂજવામાં આવે છે. દુંદાળા દેવ સૌના દુ:ખ દૂર કરતા હોવાનું કહેવાય છે. જો કે, આ જ વિધ્નહર્તાની સુરક્ષાની જવાબદારી અમદાવાદ સહિત રાજ્યભરના શહેરોની પોલીસ પર આવી ગઈ છે. શહેરોમાં પોલીસ ગણેશ ઉત્સવને લઈ સતર્ક બની છે, સુરત જેવી ઘટના અમદાવાદમાં ના બને તેને લઈ પોલીસ સતર્ક બની છે. અમદાવાદની વાત કરીએ તો અહીં અલગ-અલગ વિસ્તારોમાં અમદાવાદ પોલીસે વસાવેલા મુવેબલ કેમેરા ગણેશ પંડાલની બહાર લગાવવામા આવ્યા છે. આ કેમેરાનું મોનિટરીંગ અમદાવાદ કંટ્રોલ રૂમમાં બેઠેલા અધિકારીઓ કરશે. આ કેમેરાથી કોઈ ઘટના અથવા કોઈ અસામાજીક તત્વો કાંકરીચાળો કરશે તો તરત જ સીસીટીવી કેમેરામાં કેદ થશે અને પોલીસ તેની સામે કાર્યવાહી કરશે.
અમદાવાદ પોલીસના આ કેમેરા ફેસ રેકોગ્નાઈઝેશન તેમજ હાઈરીઝોલ્યુશન કેમેરા છે. જે પણ આરોપી અગાઉ પોલીસના ચોપડે નોંધાઈ ચૂકયો છે અને તેનો ચહેરો પોલીસના કેમેરામાં છે તેવા આરોપીને આ કેમેરા તરત કેચઅપ કરી લેશે અને કંટ્રોલ રૂમને તરત જાણ થશે કે, આરોપી વિસ્તારમાં ફરી રહ્યો છે. એટલે પોલીસના ચોપડે ફરાર હશે તો તરત જ કેમેરાના માધ્યમથી તે ઝડપાઈ જશે.
આ પણ વાંચો: ધર્મની તાકાત શું છે?
અમુક આરોપીઓના ફોટા આ કેમેરા સાથે અટેચ છે એટલે કેમેરાના માધ્યમથી આરોપીને પકડવા પણ સરળ રહેશે. સુરતમાં ગણેશ પંડાલ પર પથ્થરમારીની ઘટના બાદ ગુજરાત પોલીસ એલર્ટ બની ગઈ છે, અમદાવાદમાં કોઈ અઈચ્છનીય ઘટના ના બને તે માટે અલગ-અલગ 20 સંવેદનશીલ જગ્યાઓ પર આ કેમેરા લગવવામાં આવ્યા છે. આ કેમેરા તમામ અવર-જવર પર બાજ નજર રાખી રહ્યાં છે. આમ તો અમદાવાદ શહેરમાં આવી કયારેય ઘટના બની નથી.
છતાં સુરતની ઘટનાને પગલે અહીં પણ ગણપતિ બાપાની સુરક્ષા માટે પોલીસે આગામી 17મી તારીખ સુધી રાતના 12 વાગ્યા સુધી ખડે પગે રહેવું પડશે. ગુનેગારોને ઈશ્વરી શક્તિનો ભય હશે કે નહીં તે ખ્યાલ નથી પરંતુ જો તેઓ ગણેશ પંડાલોમાં કશુંક કરવા જશે તો અમદાવાદ શહેર પોલીસ તેને તરત પકડી પાડશે. કેમ કે, પોલીસની ત્રીજી આંખ જેવા મુવેબલ સીસીટીવી કેમેરા ચોતરફ નજર રાખી રહ્યાં છે.
આ પણ વાંચો: દલિતો અને ગણેશોત્સવઃ અહીંથી હું ભવ તરી શકું, અહીંથી ડૂબી શકું..
