1996 બાદ JNU ને મળ્યાં પહેલા દલિત પ્રમુખ, જાણો કોણ છે ધનંજય
જવાહરલાલ નહેરૂ યુનિવર્સિટી(JNU)ના વિદ્યાર્થી સંગઠનની ચાર વર્ષ બાદ યોજાયેલી ચૂંટણીમાં 1996 બાદ પહેલીવાર એક દલિત યુવક વિદ્યાર્થી સંગઠનનો પ્રમુખ બન્યો છે.
KhabarAntar
દેશભરના વિદ્યાર્થી રાજકારણમાં બૌદ્ધિકોનો અડ્ડો ગણાતી જવાહરલાલ નહેરૂ યુનિવર્સિટીના વિદ્યાર્થી સંગઠનને વર્ષ 1996 બાદ પહેલીવાર દલિત પ્રમુખ મળ્યાં છે. જેએનયુ તરીકે ઓળખાતી આ યુનિવર્સિટીમાં ફરી એકવાર ડાબેરીઓનો દબદબો જોવા મળ્યો છે. જવાહરલાલ નેહરુ યુનિવર્સિટી સ્ટુડન્ટ યુનિયન(JNUSU)ની ચૂંટણીમાં ડાબેરીઓએ ભાજપની વિદ્યાર્થી પાંખ ABVPને હરાવીને તમામ ચાર બેઠકો જીતી લીધી છે. હવે JNUSU ની ચારેય બેઠકો - પ્રમુખ, ઉપપ્રમુખ, મહામંત્રી અને સંયુક્ત સચિવ ડાબેરીઓ પાસે છે. જેએનયુ સ્ટુડન્ટ્સ યુનિયનના અધ્યક્ષ તરીકે ધનંજય નામના દલિત યુવક ચૂંટાયા છે, જેમને 2973 મત મળ્યા છે. આ જીત સાથે 27 વર્ષ બાદ જેએનયુ સ્ટુડન્ટ્સ યુનિયનને ડાબેરીઓ તરફથી દલિત પ્રમુખ મળ્યો છે. અગાઉ 1996-97માં બટ્ટીલાલ બૈરવા જેએનયુના પહેલા દલિત પ્રમુખ બન્યા હતા.
કોણ છે JNU વિદ્યાર્થી સંઘના નવા દલિત પ્રમુખ ધનંજય?
ધનંજય બિહારના ગયા જિલ્લાના વતની છે. ધનંજય સ્કૂલ ઓફ આર્ટસ એન્ડ એસ્થેટિક્સમાંથી પીએચડી કરી રહ્યા છે. ડાબેરી ધનંજયે એબીવીપીના ઉમેશચંદ્ર અજમીરાને 934 મતોથી હરાવીને જીત મેળવી છે.
બટ્ટીલાલ બૈરવા પછી ધનંજય પ્રથમ દલિત JNUSU પ્રમુખ છે. બટ્ટીલાલ બૈરવા 1996માં જીત્યા હતા.
ચૂંટણી જીત્યા પછી ધનંજયે કહ્યું, 'આ વિદ્યાર્થીઓની જીત છે. વિદ્યાર્થીઓએ છેતરપિંડી અને સરકાર દ્વારા ભંડોળમાં કાપ મૂકવાની સામે ડાબેરીઓને પસંદ કર્યા છે.'
ધનંજયે વધુમાં કહ્યું, “આ જીત જેએનયુના વિદ્યાર્થીઓનો જનમત છે કે તેઓ નફરત અને હિંસાની રાજનીતિને નકારી કાઢે છે. વિદ્યાર્થીઓએ ફરી એકવાર અમારા પર વિશ્વાસ દર્શાવ્યો છે. અમે તેમના અધિકારો માટે લડવાનું ચાલુ રાખીશું અને વિદ્યાર્થીઓને લગતા મુદ્દાઓ પર કામ કરીશું. JNU વિદ્યાર્થી સંઘના પ્રમુખ તરીકે કેમ્પસમાં મહિલાઓની સુરક્ષા, ભંડોળમાં કાપ, શિષ્યવૃત્તિમાં વધારો, ઈન્ફ્રાસ્ટ્રક્ચર અને જળ સંકટ એ મારો મુખ્ય એજન્ડા રહેશે.”
વિજેતા વિદ્યાર્થીઓનું તેમના સમર્થકો દ્વારા 'લાલ સલામ' અને 'જય ભીમ'ના નારા વચ્ચે સ્વાગત કરવામાં આવ્યું હતું. વિદ્યાર્થીઓએ ઉમેદવારોની જીતની ઉજવણી કરવા માટે લાલ, સફેદ અને વાદળી ઝંડા પણ લહેરાવ્યા હતા. સ્ટુડન્ટ્સ ફેડરેશન ઓફ ઈન્ડિયા (SFI)ના અવિજીત ઘોષે ABVPની દીપિકા શર્માને 927 મતોથી હરાવીને ઉપાધ્યક્ષ પદ પર જીત મેળવી છે. ઘોષને 2,409 વોટ મળ્યા જ્યારે શર્માને 1,482 વોટ મળ્યા. ડાબેરી સમર્થિત બિરસા આંબેડકર ફુલે સ્ટુડન્ટ્સ એસોસિએશન (BAPSA) ના ઉમેદવાર પ્રિયાંશી આર્યએ જનરલ સેક્રેટરીના પદ પર જીત મેળવી, એબીવીપીના અર્જુન આનંદને 926 મતોથી હરાવ્યા. આર્યને 2,887 વોટ મળ્યા જ્યારે આનંદને 1961 વોટથી સંતોષ માનવો પડ્યો. યુનાઈટેડ લેફ્ટે આર્યને સમર્થન આપ્યું હતું જ્યારે ચૂંટણી સમિતિએ તેના ઉમેદવાર સ્વાતિ સિંહની ઉમેદવારીને એબીવીપી દ્વારા પડકારવામાં આવ્યા બાદ તેનું નામાંકન રદ કર્યું હતું. સંયુક્ત સચિવ પદ પર ડાબેરી જૂથના મોહમ્મદ સાજિદે ABVPના ગોવિંદ ડાંગીને 508 મતોથી હરાવીને જીત મેળવી હતી. ચાર પોસ્ટમાં સાજિદની જીતનું માર્જિન સૌથી ઓછું છે. ચૂંટણીમાં જીત સાથે જ ડાબેરીઓએ JNUમાં પોતાનો ઝંડો લહેરાવ્યો હતો. ABVPએ કાંટે કી ટક્કર આપી હતી અને પ્રારંભિક વલણોમાં કેન્દ્રીય પેનલની ચારેય પોસ્ટ જીતી હતી. યુનાઈટેડ લેફ્ટ પેનલમાં AISA, ડેમોક્રેટિક સ્ટુડન્ટ્સ ફેડરેશન (DSF), સ્ટુડન્ટ્સ ફેડરેશન ઑફ ઈન્ડિયા (SFI) અને ઑલ ઈન્ડિયા સ્ટુડન્ટ્સ ફેડરેશન (AISF)નો સમાવેશ થાય છે. JNUSUની સેન્ટ્રલ પેનલ માટે કુલ 19 ઉમેદવારો મેદાનમાં હતા. તે જ સમયે, સ્કૂલ કાઉન્સિલર માટે 42 લોકો પોતાનું નસીબ અજમાવી રહ્યા હતા. વિદ્યાર્થી સંઘના પ્રમુખ પદ માટે આઠ ઉમેદવારો વચ્ચે સ્પર્ધા હતી. જવાહરલાલ નેહરુ યુનિવર્સિટી સ્ટુડન્ટ્સ યુનિયનની શુક્રવારે યોજાયેલી ચૂંટણીમાં 73 ટકા મતદાન થયું હતું, જે છેલ્લા 12 વર્ષમાં સૌથી વધુ છે.
.
આવું રહ્યું JNUSU ચૂંટણીનું પરિણામ
ઉપરાષ્ટ્રપતિ પદ માટે અવિજીત ઘોષ (ડાબે)ને 2649 મત મળ્યા છે. તેમણે દીપિકા શર્મા (ABVP) ને 927 મતોથી હરાવ્યા.
પ્રિયાંશી આર્યા(ડાબેરીઓ દ્વારા સમર્થિત) મહાસચિવ પદ પર જીતી છે, તેને 3307 મત મળ્યા છે. પ્રિયાંશી આર્યએ અર્જુન આનંદ(ABVP)ને 926 મતોથી હરાવ્યા છે.
મોહમ્મદ સાજિદ (ડાબેરી) સંયુક્ત સચિવ પદ પર જીત્યા છે, તેમને 2893 મત મળ્યા છે. તેમણે ગોવિંદ ડાંગી (ABVP) ને 508 મતોથી હરાવ્યા.
આ પણ વાંચો: હવે JNU કેમ્પસમાં ધરણા-વિરોધ પ્રદર્શન કરવા પર રૂ. 20 હજારનો દંડ થશે
Khabarantar.com ના બહુજન સમાજને સમર્પિત સમાચારોની નિયમિત અપડેટ મેળવવા માટે અમારી વોટ્સએપ ચેનલને ફોલો કરો. અહીં ક્લિક કરો.
Khabarantar.com ના બહુજન સમાજને સમર્પિત સમાચારોની નિયમિત અપડેટ મેળવવા માટે અમારી વોટ્સએપ ચેનલને ફોલો કરો. અહીં ક્લિક કરો.
-
James v bhoj. Gujarat bhavnagarVerry good
