228 કિલો સોનું ગાયબ થવા મુદ્દે શંકરાચાર્ય અને કેદારનાથ કમિટી સામસામે

તાજેતરમાં જ શંકરાચાર્ય સ્વામી અવિમુક્તેશ્વરાનંદે ઉત્તરાખંડના યાત્રાધામ કેદારનાથમાંથી 228 કિલો સોનું ગાયબ થયું હોવાનો સનસનીખેજ દાવો કર્યો હતો. તેમણે મીડિયાને પણ મામલે સવાલો ઉઠાવવા કહ્યું હતું. તેમના દાવાએ સૌ કોઈને ચોંકાવી દીધા હતા. ત્યારે હવે આ મામલે કેદારનાથ ધામ કમિટી અને શંકરાચાર્ય સામસામે આવી ગયા છે. કેદારનાથ કમિટીએ શંકરાચાર્યને મીડિયામાં ચમકવાની ટેવ હોવાનું જણાવ્યું છે. 

બદ્રીનાથ-કેદારનાથ મંદિર સમિતિના અધ્યક્ષ અજયેન્દ્ર અજયે શંકરાચાર્ય મુદ્દે કહ્યું છે કે 'સ્વામી અવિમુક્તેશ્વરાનંદને દરરોજ પ્રેસ કોન્ફરન્સ કરવાની અને આક્ષેપો કરવાની ટેવ છે. તેમને સમાચારમાં રહેવાની આદત પડી ગઈ છે.  જો તેમની પાસે કોઈ તથ્ય નથી તો કેદારનાથ ધામનું નામ કલંકિત કરવાની કોઈને મંજૂરી નથી.

અજયેન્દ્રએ વધુમાં કહ્યું હતું કે, હું સ્વામી અવિમુક્તેશ્વરાનંદજીનું સન્માન કરું છું પરંતુ તેઓ સવારથી સાંજ સુધી પ્રેસ કોન્ફરન્સ કરે છે. આટલી પ્રેસ તો કોઈ નેતા પણ નહીં કરતો હોય. સમાચારોમાં રહેવું અને મીડિયાની હેડલાઇન્સ બનવું તેમની આદત છે.

આ પણ વાંચો:  ચારધામ યાત્રા અને મોતનો ખતરો અને લૂંટની ખાતરી

હું તેમને વિનંતી કરું છું કે તેમણે કેદારનાથમાંથી સોનું ચોરાયાના જે આરોપો લગાવ્યા છે તેને લગતા તથ્યો સામે લાવે. એ પછી તેમણે ઓથોરિટીનો સંપર્ક કરવો જોઈએ અને તપાસની માંગ કરવી જોઈએ. જો તેમને કોઈ ઓથોરિટી પર વિશ્વાસ ન હોય તો હાઈકોર્ટ કે સુપ્રીમ કોર્ટમાં જઈ શકાય છે. બાકી તેમની પાસે જો કોઈ તથ્ય નથી તો તેમને કેદારનાથ ધામનું નામ કલંકિત કરવાની મંજૂરી નથી.'

મંદિરમાં 228 કિલો સોનું ગાયબ થવાના આરોપો મુદ્દે મંદિર સમિતિએ કહ્યું હતું કે, કેદારનાથમાં ગર્ભગૃહને સોનાની પરત લગાવવામાં આવી છે તેની સાથે અમારે કોઈ લેવાદેવા નથી. આ કાર્ય મુંબઈના એક દાતા દ્વારા કરવામાં આવ્યું છે. તેને મંદિર સમિતિ અને સરકાર સાથે કોઈ સંબંધ નથી. તેમણે મુંબઈના સિદ્ધિ વિનાયક, કાશી વિશ્વનાથ મંદિર સહિત અનેક મંદિરોમાં આવું કામ કર્યું છે. આવા આક્ષેપોથી દેશના દાતાઓની શ્રદ્ધાને પણ ઠેસ પહોંચે છે. 

અજયેન્દ્રએ પણ સોનું ગુમ થવાની અફવા અંગે વિગતવાર પ્રતિક્રિયા આપતા કહ્યું હતું કે, હું આપને જણાવવા માંગીશ કે, કેદારનાથ ધામમાં જે સોનું છે તે ૨૩ કિલો જેટલું છે. અગાઉ મંદિરમાં ૨૩૦ કિલો ચાંદીની પ્લેટો હતી. જેના પરથી અમુક લોકોએ ૨૩૦ કિલો ચાંદીની જગ્યાએ એટલું જ સોનું આવ્યું હશે અને મંદિરમાં ઓછું લગાવવામાં આવ્યું હશે તેવું અનુમાન લગાવ્યું છે. આના કારણે જ મૂંઝવણ સર્જાઈ હતી. સોનાની પરત ચડાવવા માટે ૧૦૦૦ કિલો તાંબુ લગાવવામાં આવ્યું છે અને તેની ઉપર ૨૩ કિલો સોનાની પરત ચડાવવામાં આવી છે. સુવર્ણ મંદિર સહિત ઘણી જગ્યાએ આ ટેકનિકનો ઉપયોગ કરવામાં આવે છે. શંકરાચાર્ય તરફથી આવા જ નિવેદનો આવતા રહ્યા છે. તેમણે કોંગ્રેસનો એજન્ડાથી દૂર રહેવું જોઈએ.

આ પણ વાંચો: બોલો લો! કેદારનાથ મંદિરમાંથી 228 કિલોગ્રામ સોનું ગુમ થયું