વોટ્સએપ ચેનલ ફોલો કરવા અહીં ક્લિક કરો.
ઇરાકમાં પુરૂષો 9 વર્ષની છોકરીઓ સાથે લગ્ન કરી શકશે, કાયદામાં સુધારાની તૈયારી
એકબાજુ દુનિયા આખી બાળલગ્નને ખતમ કરવાના પ્રયાસો કરી રહી છે, બીજી તરફ આ દેશ ઉંધી દિશામાં આગળ વધી રહ્યો હોય તેમ લાગી રહ્યું છે.
KhabarAntar
દુનિયા આખીમાં એકબાજુ બાળ લગ્નની દુષ્ટતાને ખતમ કરવાના પ્રયાસો ચાલુ છે. ત્યારે હજુ પણ એવા ઘણા દેશો છે જે બાળ લગ્નને કાયદેસર બનાવવા માટે મથી રહ્યાં છે. વાત ઈરાકની છે, જ્યાં લગ્નની ઉંમરમાં સુધારાની તૈયારીઓ શરૂ કરી દેવાઈ છે. એવો દાવો કરવામાં આવી રહ્યો છે કે સરકાર છોકરીઓની લગ્નની ઉંમર ઘટાડવા જઈ રહી છે. આવી સ્થિતિમાં પુરુષો નવ વર્ષની છોકરી સાથે લગ્ન કરી શકશે.
જો આ સુધારો અહીં પસાર થશે તો માત્ર લગ્નની ઉંમર જ નહીં પરંતુ છૂટાછેડા, બાળકોની કસ્ટડી અને સંપત્તિ જેવા મહિલાઓના વિશેષ અધિકારો પર પણ અંકુશ આવી જશે. આ બિલ ઇરાકી નાગરિકોને પારિવારિક બાબતો પર નિર્ણય લેવા માટે ધાર્મિક અધિકારીઓ અથવા નાગરિક ન્યાયતંત્રની પસંદગી કરવાની પણ મંજૂરી આપશે.
મિડલ ઈસ્ટ આઈ અનુસાર, પર્સનલ સ્ટેટસ એક્ટ ૧૯૫૯ના નિયમ ૧૮૮ને બદલવાની વાત થઈ રહી છે. જૂનો નિયમ અબ્દુલ કરીમ કાસિમ સરકારે બનાવ્યો હતો. કાસિમ એક પ્રગતિશીલ ડાબેરી તરીકે જાણીતા હતા, જેમના સમય દરમિયાન ઘણા મોટા ફેરફારો લાવવામાં આવ્યા હતા. આમાંથી એક હતી છોકરીઓના લગ્ન ૧૮ વર્ષની થાય પછી જ કરવાનો ફેરફાર. તેને પચાસના દાયકાના અંતમાં સમગ્ર મધ્ય પૂર્વમાં શ્રેષ્ઠ કાયદાઓમાંનો એક માનવામાં આવતો હતો. માત્ર ચોક્કસ ઉંમરે લગ્ન જ નહીં, આ નિયમમાં બીજી ઘણી બાબતો પણ કહેવામાં આવી છે, જેમ કે પુરુષો તેમની ઈચ્છા મુજબ બીજી વાર લગ્ન કરી શકતા નથી.
કાયદા અનુસાર, જો કોઈ મુસ્લિમ પુરુષ અને બિન-મુસ્લિમ મહિલા લગ્ન કરવા ઈચ્છે છે, તો તેના પર કોઈ શરત અથવા પૂર્વ શરત રહેશે નહીં. જો કે, કાયદો લાગે તેટલો સીધો ન હતો. વસ્તીને ખુશ કરવા માટે, એક નિયમ પણ દાખલ કરવામાં આવ્યો હતો કે જો પરિવાર અને ન્યાયાધીશની પરવાનગી હોય તો ૧૫ વર્ષની ઉંમરે પણ લગ્ન થઈ શકે છે.
હાલમાં ઈરાકમાં મોહમ્મદ શિયા અલ-સુદાનીની સરકાર છે, જે પોતે શિયા મુસ્લિમ છે અને તેને શિયા પક્ષોનું સમર્થન છે. શિયા પક્ષોના ગઠબંધનની આગેવાની હેઠળની ઇરાકની સરકારે કહ્યું છે કે સુધારો ઇસ્લામિક શરિયા કાયદા હેઠળ છે અને તેનો ઉદ્દેશ્ય યુવાન છોકરીઓની સુરક્ષા કરવાનો છે. ખાસ વાત એ છે કે ઈરાકી મહિલા સમૂહના સતત વિરોધ છતાં ઈરાક સરકાર આ કાયદો પસાર કરવા માંગે છે.
કાયદામાં સુધારો કરવા માટે પહેલાથી જ પ્રયાસો કરવામાં આવ્યા છે. જો કે, પહેલીવાર એવું લાગી રહ્યું છે કે સાંસદો કાયદો પસાર કરવામાં સફળ થઈ શકે છે. આ પહેલા કાયદામાં બીજો સુધારો ૧૬ સપ્ટેમ્બરે પસાર કરવામાં આવ્યો હતો. એક રિપોર્ટ અનુસાર તેને લો ૧૮૮ નામ આપવામાં આવ્યું છે. આ કાયદો ઇરાકમાં રહેતા તમામ સંપ્રદાયોના પરિવારોને સમાનરૂપે લાગુ કરવામાં આવશે.
આ પણ વાંચો: સંસદથી લઈ એરપોર્ટ સુધી બધું જ વકફની જમીન પર બનેલું છે…
